FUEL MASTERS, NO. 4 SEED GINS MATIBAY SA TUKTOK

KINALAWIT ng Phoenix Fuel Masters ang mahalagang panalo matapos pagulungin ang Blackwater Elite, 97-91 kagabi sa 2018 Philippine Basketball Association Governors Cup sa Araneta Coliseum.

Binalikat nina locals Calvin Abueva at Matthew Wright ang opensa para sa Fuel Masters upang itarak ang 8-3 karta at makasiguro sa top four sa 11-game elimination round.

Makakakuha ng twice-to-beat incentive ang top four teams pagkatapos ng elims.

Nagtala si Abueva ng 25 points at walong rebounds habang tumipa si Wright ng 23 puntos, pitong rebounds at limang assists.

Kumayod din para sa Phoenix si import Eugene Phelps na nirehistro ang 16 pts. at 19 rebounds.

Tumikada naman si reinforcement Henry Walker ng 21 markers at 12 boards para sa Elite na nalaglag para sa bonus, nalasap nila ang pang-apat na talo sa 11 laban.

Lumaban ng sabayan ang Blackwater sa unang dalawang periods kaya nahawakan nila ang four-point lead, 48-44 sa halftime.

Pumalag ang Fuel Masters sa third canto, rumatrat ng 28-21 para makuha ang bentahe, 72-69 papasok ng fourth canto.

Samantala sa ikalawang laro, tinalo ng Ginebra Gin Kings ang TNT KaTropa sa iskor na 112-93. Bumida sa laro si Justine Brownlee sa 31 puntos. (ATD)