2 lalaki niratrat, utas

PATAY ang dalawang lalaki na imbes pumunta sa kani-kanilang mga namayapang mahal sa buhay ay pinaglalamayan ngayon sa magkahiwalay na insidente sa Laguna.

Sa inisyal na ulat mula sa awtoridad, alas-9:00 ng umaga nang unang pagbabarilin ng hindi nakilalang suspek sa Bgy. Santiago 2, San Pablo City si Edwin Manalo na nakaupo lang sa waiting shed katabi ng isang tindahan.

Dead-on-arrival sa ospital ang biktima dahil sa tatlong tama ng bala sa katawan.

Samantala, sa Bgy. Landayan, San Pedro City, Laguna naman binaril si Julio Insorio, Jr. habang namimitas ng kalamansi kasama ang kanyang asawa na pinalad namang hindi nadamay.

Kilala umanong drug user ang biktima sa lugar at minsan nang nakulong dahil dito at kilala rin umanong sangkot sa mga serye ng motornapping sa San Pedro at Biñan kaya ito ang mga tinitingnang anggulo sa krimen.