Hirit ng mga manggagawa sa DOLE: P20 DAGDAG-SAHOD, LIMOS!

NAGPIKET ang mga miyembro ng Bukluran ng Manggagawang Pilipino (BMP) sa harap ng isang ho­tel sa Malate, Manila kung saan nagaganap ang konsul­tasyon ng NCR Wage Board sa employers sector.

Layunin ng konsultas­yon na makuha ang pananaw ng mga negosyante sa panu­kalang P20 na dagdag-umento.

Sa nasabing protesta, bitbit ng mga manggagawa ang placard na nananawa­gan ng: “Hanggang saan a­abot ang P20 mo?”, “Living wage, hindi starvation wage”, “Sa inyo bilyon, sa amin beinte!”.

“Hindi kami pulubi, ayaw namin ng barya!” ani Lito Rastica, ikalawang pa­ngulo ng BMP.

Insulto umano sa mga manggagawa na mabayaran ng mas mababa sa living wage na ginagarantiyahan ng Konstitusyon.

Giit nila, hindi makata­rungan ang pambabarat sa suweldo nila habang tumu­tubo ng bilyun-bilyon sa na­karaang mga taon ang mala­laking kapitalista.

Samantala, ayon kay Ka Leody de Guzman, tagapag­salita ng Partido Lakas ng Masa (PLM) at chairman ng BMP, hindi matutumbasan ng P20 ang pinagsamang sakripisyo, pagod, hirap at talino ng mga manggaga­wang Pilipino.

Lalo pa umano at nami­milipit na ang mga pamilya sa pagtaas ng presyo ng mga bilihin dulot ng TRAIN Law, mas mataas na VAT, pag­bagsak ng piso kontra dolyar at hindi stable na presyo ng langis sa pan­daig­digang merkado. (BRT)