Parusa sa nuisance candidates, dapat lang!

TUWING halalan, hindi nawawala ang mga nagpa-file ng Certificate of Candidacy (COC) na tinatawag na ‘nuisance candidates’.

Sila ang mga itinuturing na umano ay mga pam­pa­gulo.

Kaugnay nito, isang panukala ang isinusulong sa Senado kung saan papatawan ng parusa ang mga nuisance candidate.

Sa ilalim ng Senate Bill 911, maaaring makulong ng isa hanggang anim na taon at pagmumultahin ng P50, 000 ang mga nuisance o ang sinumang mapatutunayang pinaglalaruan ang paghahain ng kan­didatura.

Hindi maitatanggi na may pagkakataon na sadyang naaabuso ang proseso ng halalan.

Kamakailan ay may mga nag-file ng COC na aminadong gusto lang sumikat sa social media at mayroon ding trip lang.

Utang na loob, huwag sanang gawing katatawanan ang eleksiyon, huwag natin itong babuyin.

Sa ngayon, 152 ang naghain ng COC sa pagka-senador at inaasahang marami ang matatanggal kapag naisalang na ito sa mga pagdinig ng Comelec.