MAIGTING ANG KOMPETISYON KAY BIADO SA INTERNATIONAL 9-BALL

DALAWANG buwan pa ang layo ng 2018 World 9-Ball Championship sa Qatar pero inaasahang ma­raramdaman na ang maigting na kompetisyon sa pagdagsa ng mga malulupit na bilya­rista mula sa iba’t-ibang ba­hagi ng mundo sa pagtaas ng telon ng 2018 International 9-Ball Open sa Norfolk, Virginia sa Oktubre 21.

Kasama sa mga uma­asinta ng korona ang mga bilyaristang Pinoy sa pangu­nguna ni World Pool Billiards Association (WPA) no. 2 Carlo “ Black Tiger” Biado na siya ring hari ng 2017 World 9-Ball Champion­ship. Sa­riwa si Biado sa pa­giging MVP ng Taiwan - Philip­pines na billiards face-off kung saan nagwagi ang mga Pinoy pagkatapos ng tatlong araw ng bakbakan.

Kasama rin ni Biado sa talaan ng cue artists na nag-aambisyon sa kampeonato at ng top prize na $40,000 sina Warren “The Warrior” Kiamco, Zoren James “Do­dong Diamond” Aranas, Johan Chua, Raymund Fa­raon, 2017 World Straight­pool champion Lee Van Cor­teza, at AZBilliards money­board no. 2 Dennis “Robo­cop” Orcullo.

Susubok ding makaakyat sa trono si dating world champion at tubong Isabela na si Alex “The Lion” Pagu­layan na kumakatawan na sa Canada.

Bukod sa Pilipinas, may mga kinatawan din sa pres­tihiyosong torneo ang mga bansang itinuturing na bil­liards powerhouse katulad ng Finland, Netherlands, Ger­many, Taiwan, Austria, Scotland, Japan, England, Russia, Albania, Chinese Taipei at USA.

Mula sa mga bansang ito ay ang mga batikang manu­numbok na sina Mika Im­monen, Niels Feijen, Ralf Soquet, Jayson Shaw, Mario He, Albin Ouschan, Oi Naoyuki, Kun Lin Wu, Chia Chen Hsieh, Darren Apple­ton, Fedor Gorst, WPA no. 1 Eklent Kasi, Shane Van Boening, Earl “The Pearl” Strickland at Johnny Archer.