Misis dadalaw sa mister | SHABU SA BULAK, BUKING

KALABOSO ang dala­wang dadalaw lamang sa selda matapos mahulihan ng sinasabing shabu sa Lock-Up Jail, Batangas City.

Batay sa ulat, alas-6:10 ng gabi, bibisitahin ng suspek na si Ria Sambajon alyas Yang, kasama si Edwin Var­gas, ang kanyang mister na nakakulong sa loob.

Agad sinuri ang dala nila saka natunugan ang kahina-hinalang kilos nilang dalawa.

Masusing sinuri ang bag nito kung saan tumambad ang bulak hanggang sa ma­diskubre sa loob ang apat na pirasong sachets ng hinihi­nalang shabu.

Nauna rito, nahuli ang asawa nito sa isang buy-ope­ration sa SM Bicutan, Para­ñaque City.

Nasa kustodiya na sila ng Batangas City Police Station habang inihahanda ang kaso laban sa kanila.