Welder na pusher, huli sa drug-bust

@Balitang Probinsiya | September 23, 2023

AKLAN -- Isang welder na drug pusher ang nadakip sa drug-bust operation ng mga operatiba kamakalawa sa Bgy. Tacas, Pontevedra sa lalawigang ito.

Kinilala ang suspek na si Roland Bermejo, 37, residente ng nabanggit na barangay.

Napag-alaman na may tinanggap na impormasyon ang mga awtoridad na nagbebenta ng umano’y shabu si Bermejo kaya agad nagsagawa ng drug-bust operation ang mga ito na naging dahilan upang madakip ang suspek.

Ayon sa ulat, nakakumpiska ang pulisya ng 25 gramo ng hinihinalang shabu at markadong pera sa pag-iingat ng suspek.

Nakapiit na ang suspek na nahahaharap ngayon sa kasong paglabag sa Dangerous Drugs Act of 2002.