Magpinsan nakuryente, 1 patay

@Balitang Probinsiya | November 28, 2023

CAPIZ -- Isang laborer ang namatay at nasa kritikal na kalagayan naman ang pinsan nito nang makuryente sila kamakalawa sa Brgy. Aranguel, President Roxas sa lalawigang ito.

Kinilala ng pulisya ang nasawi na si Edmond Bonayuon, samantalang ang pinsan nito ay si Romar Bonayuon, kapwa nasa hustong edad at mga residente sa nasabing barangay.

Ayon sa ulat, tumulong ang magpinsan sa pagtayo ng poste ng isang telecommunication company sa naturang lugar at aksidenteng nahawakan ng mga biktima ang live wire ng Capiz Electric Cooperative kaya nakuryente ang sina Edmond at Romar.

Napag-alaman na sa lakas ng boltahe ay kapwa nagtamo ng 3rd degree burns ang mga biktima.

Dinala ng mga residente ang magpinsan sa pagamutan, pero idineklarang dead-on-arrival si Edmond.

Pedicab driver, tinodas sa bahay

@Balitang Probinsiya | November 28, 2023

QUEZON -- Isang pedicab driver ang namatay nang barilin ng isang hindi kilalang armadong lalaki sa loob ng kanilang bahay kamakalawa sa Brgy. 10. Catanauan sa lalawigang ito.

Ang biktimang nagtamo ng mga tama ng bala sa katawan ay nakilalang si Jaype Rocafor, nasa hustong gulang at nakatira sa nasabing barangay.

Ayon sa ulat, habang nasa loob ng kanilang bahay si Rocafor ay biglang pumasok ang suspek at agad pinagbabaril hanggang mapatay ang biktima.

Matapos ang pamamaril ay tumakas ang suspek lulan ng kanyang motorsiklo.

Iniimbestigahan na ng pulisya ang motibo ng suspek sa pamamaslang sa biktima.

Nambastos sa dalagita, sumuko

@Balitang Probinsiya | November 28, 2023

AKLAN -- Isang tricycle driver na nambastos sa isang dalagitang pasahero nito ang sumuko sa himpilan ng pulisya kamakalawa sa bayan ng Kalibo sa lalawigang ito.

Hindi na pinangalanan ang suspek, maging ang dalagitang pasahero nito ay hindi na rin pinangalanan ng mga otoridad.

Ayon sa ulat, sumakay ang dalagita sa pinapasadang tricycle ng suspek pauwi sa bahay ng biktima at habang bumibiyahe ay nagkuwento umano ang driver ng mga kabastusan tungkol sa sex.

Nang makauwi sa kanilang bahay ay nagsumbong ang dalagita sa kanyang ama, at dahil dito ay pinost ng ama sa social media ang pambabastos ng suspek sa kanyang anak.

Nabatid na nabasa ng suspek ang post ng ama ng dalagita kaya nagpasya itong sumuko at sa ngayon ay nahaharap ang tricycle driver sa kasong child abuse.