Wanted sa Laguna, tiklo sa Romblon

@Balitang Probinsiya | August 21, 2023

ROMBLON -- Isang wanted na drug pusher sa Laguna ang nadakip ng mga awtoridad kamakalawa sa pantalan ng Odiongan sa lalawigang ito.

Ang suspek ay kinilala ng pulisya na si Victor Aragon, nasa hustong gulang, at pansamantalang nakatira sa nasabing bayan.

Ayon sa ulat, inaresto ng pulisya ang suspek sa bisa ng warrant of arrest na inisyu ng korte kaugnay sa kinasasangkutan nitong kasong paglabag sa Comprehensive Dangerous Drugs Act of 2002.

Nabatid na may nagbigay impormasyon sa pulisya sa kinaroroonan ni Aragon kaya agad rumesponde ang mga ito at nahuli ang suspek.

Kusang sumama ang suspek sa mga awtoridad nang dakpin siya sa nasabing lugar.