Wanted na lifeguard, nasakote

@Balitang Probinsiya | April 27, 2023

BATANGAS—Isang wanted na lifeguard ang nadakip ng mga tauhan ng pulisya, kamakalawa sa kanyang hideout sa Bgy. Calayo, Nasugbu sa lalawigang ito.

Kinilala ang suspek na si Ariston Baon, nasa hustong gulang, lifeguard sa beach resort at pansamantalang nakatira sa nabanggit na barangay.

Napag-alaman na dinakip ng mga tauhan ng pulisya ang suspek sa bisa ng warrant of arrest na inisyu ng korte kaugnay sa kinasasangkutan nitong acts of lasciviousness sa lalawigan.

Nabatid na may nagbigay impormasyon sa pinagtataguan ni Baon, kaya agad itong sinalakay ng mga awtoridad at dinakip ang suspek.

Nakapiit na ngayon ang suspek sa detention cell ng himpilan ng pulisya.