Wanted na komunistang karnaper, tiklo

@Balitang Probinsiya | September 23, 2023

NEGROS OCCIDENTAL -- Isang wanted na komunistang karnaper ang inaresto ng pulisya kamakalawa sa kanyang hideout sa Bgy. Yao-Yao, Cauayan sa lalawigang ito.

Ang suspek ay kinilala ng pulisya na si Joshua Rabor, alyas “Ka Jake”, nasa hustong gulang, miyembro ng New People’s Army (NPA) sa Negros Island at pansamantalang nakatira sa nasabing barangay.

Ayon sa ulat, dinakip ang suspek sa bisa ng warrant of arrest na inisyu ng korte kaugnay sa kinasasangkutan nitong kasong carnapping.

Nabatid na matagal nang pinaghahanap ng pulisya ang suspek at kamakalawa lang itong natiyempuhan para dakpin.

Hindi naman nanlaban ang suspek sa mga awtoridad at sa ngayon ay nakapiit na sa detention cell ng himpilan ng pulisya.