Umawat sa away, bayaw pinatay

@Balitang Probinsiya | July 10, 2023

ZAMBOANGA DEL SUR -- Isang 29-anyos na binata na umawat sa away ang pinagbabaril at napatay ng kanyang bayaw kamakalawa sa Bgy. Dalaon, Molave sa lalawigang ito.

Ang biktima na nagtamo ng mga tama ng bala sa katawan ay nakilalang si John Lester Bermejo, samantalang ang suspek ay ang bayaw nito na si Welmer Apiag, 32, at kapwa nakatira sa nabanggit na barangay.

Ayon sa ulat, nagkaroon ng pagtatalo si Apiag at ang misis nito na kapatid naman ni Bermejo at dahil dito ay inawat ng biktima ang suspek.

Hindi nagustuhan ni Apiag ang pag-awat sa kanya ng bayaw kaya kinuha nito ang kanyang baril at pinagbabaril ang biktima hanggang mapatay.

Kusang sumuko sa pulisya ang suspek matapos mapatay ang kanyang bayaw, habang sinampahan na ng kasong murder at illegal possession of firearms and ammunitions si Apiag.