Tripulante natagpuang patay

@Balitang Probinsiya | March 14, 2023

CEBU—Isang tripulante ang natagpuang patay habang nakalutang kamakalawa sa dagat na sakop ng Bgy. Ibo, Lapu-Lapu City sa lalawigang ito.

Ang biktima ay nakilalang si Joseph Villamor, nasa hustong gulang, tripulante ng isang tugboat.

Nabatid na ilang mangingisda ang nag-report sa pulisya tungkol sa natagpuan nilang bangkay ng biktima na nakalutang sa dagat.

Ayon sa ulat, huling nakitang buhay si Villamor nang tumalon sa dagat matapos lumubog ang sinasakyan nitong tugboat.

Nabatid na rumesponde ang rescue team ng Philippine Coast Guard (PCG) pero hindi natagpuan si Villamor, at kamakalawa ay mga mangingisda na ang nakatagpo sa bangkay ng biktima sa naturang karagatan.