Tricycle driver, patay sa bus

@Balitang Probinsiya | July 19, 2023

NEGROS OCCIDENTAL -- Isang tricycle driver ang namatay nang mabangga ng isang pampasaherong bus kamakalawa sa national highway ng Bgy. Cabacungan, La Castellana sa lalawigang ito.

Ang biktima ay kinilala ng pulisya na si Anthony Paulan, 42, residente ng nasabing lalawigan.

Ayon sa ulat, nawalan umano ng kontrol ang driver ng bus sa pagmamaneho kaya nabangga nito ang tricycle na minamaneho ng biktima.

Nabatid na sa lakas ng pagkakabangga ay nagtamo ng malaking pinsala sa ulo at katawan ang biktima na agad nitong ikinamatay.

Nakapiit na ngayon ang hindi pinangalanang driver ng bus na nahaharap sa kasong reckless imprudence resulting to homicide and damage to property.