Tricycle driver niratrat, nadedbol

@Balitang Probinsiya | November 20, 2023

BASILAN -- Isang tricycle driver ang namatay nang pagbabarilin ng mga armadong lalaki kamakalawa sa Brgy. Maloon San Jose, Isabela City sa lalawigang ito.

Ang biktimang nagtamo ng mga tama ng bala sa katawan ay nakilalang si Angelito Seblero, nasa hustong gulang at residente sa naturang lungsod.

Ayon sa ulat, habang minamaneho ni Seblero ang kanyang tricycle ay biglang sumulpot ang mga hindi kilalang suspek at agad pinagbabaril ang biktima.

Mabilis na tumakas ang mga suspek nang matiyak na patay na ang biktima.

Iniimbestigahan pa ng pulisya ang motibo ng mga suspek sa pamamaslang kay Seblero.