Trak bumangga sa trak, 1 sugatan

@Balitang Probinsiya | January 16, 2021

AKLAN—Isang driver ang sugatan nang aksidenteng bumangga sa likurang bahagi ng trak ang minamaneho rin nitong trak kamakalawa sa Bgy. Lalab, Batan.

Kinilala ang biktima na si Robito delos Santos, residente ng nabanggit na bayan.

Ayon sa ulat, habang minamaneho ni Delos Santos ang trak ay aksidente itong bumangga sa likurang bahagi ng nakaparadang trak sa naturang barangay.

Nabatid na sa lakas ng pagkakabangga ay nawasak ang unahang bahagi ng trak na minamaneho ni Delos Santos at nagtamo ng malaking sugat sa ulo ang biktima.

Ginagamot na ngayon sa ospital si Delos Santos, samantalang patuloy ang imbestigasyon ng pulisya para mabatid kung sino sa biktima at driver ng nakaparadang trak ang may pananagutan sa aksidente.