Tama na sa away-pulitika, magkaisa muna para sa mga nilindol

by Info @Editorial | June 11, 2026

Sa gitna ng matinding pinsalang idinulot ng lindol sa Mindanao, hindi bangayan sa pulitika ang kailangan ng taumbayan. Ang hinihingi ng oras ay mabilis na ayuda, malinaw na koordinasyon, at tunay na malasakit para sa mga pamilyang nawalan ng mahal sa buhay, nasugatan, nawalan ng tirahan, at patuloy na nangangamba sa aftershocks.

May panahon para sa pulitika. May panahon para sa imbestigasyon, sisihan, at pagtatalo. Ngunit sa oras ng kalamidad, dapat manaig ang pagkakaisa. 

Hindi dapat maantala ang relief operations, medical assistance, search and rescue, clearing operations, at assessment ng mga nasirang imprastruktura dahil lamang sa bangayan ng mga opisyal.

Ang mga biktima ng lindol ay hindi nagtatanong kung anong partido ang tutulong sa kanila. Ang tanong nila ay kung kailan darating ang pagkain, tubig, gamot, tolda, doktor, at ligtas na matutuluyan. Ang tanong nila ay kung may makikinig ba sa kanilang hinaing at kung may gobyernong kikilos nang mabilis at maayos.

Dapat magkaisa ang pambansa at lokal na pamahalaan, mga ahensya, militar, pulisya, pribadong sektor, Simbahan, civil society, at ordinaryong mamamayan.