Sundalo nalunod sa ilog

@Balitang Probinsiya | March 4, 2023

CATANDUANES—Isang sundalo ng Philippine Army (PA) ang namatay nang malunod kamakalawa sa ilog na sakop ng Bgy. Pagsangahan, San Miguel sa lalawigang ito.

Ang biktima ay nakilalang si Pfc. Rodney de Jesus, nakatalaga sa 83rd Infantry Battalion ng PA na nakabase sa lalawigan.

Nabatid na tumatawid umano sa ilog si De Jesus, kasama ang ilang sundalo nang rumagasa ang agos sa ilog kaya tinangay ang biktima.

Napag-alaman na agad sumaklolo ang mga kasamahang sundalo ni De Jesus, pero hindi agad nakita ang biktima na lumubog sa ilog.

Nabatid na makalipas ang ilang oras na paghahanap ay nakita rin ang biktima, pero patay na ito nang iahon sa ilog.