Sundalo, dedbol sa engkuwentro

@Balitang Probinsiya | November 11, 2020

NEGROS ORIENTAL—Isang sundalo ng Philippine Army (PA) ang napatay sa naganap na engkuwentro sa pagitan ng tropa ng pamahalaan at mga miyembro ng New People’s Army (NPA) kamakalawa sa Bgy. Sandayao, Guinhulngan City.

Hindi muna pinangalanan ng mga awtoridad ang napatay na sundalo hangga’t hindi naipapabatid sa pamilya nito ang pagkamatay ng biktima.

Nagpapatrulya umano ang tropa ng pamahalaan nang pagbabarilin sila ng mga terorista kaya’t tinamaan ng bala at napatay ang biktima.

Kaagad gumanti ng putok ang mga kawal ng Philippine Army (PA) dahilan upang tumakas ang mga NPA.

Patuloy pang tinutugis ng tropa ng pamahalaan ang mga tumakas na mga terorista.