Sanggol, natagpuan sa kuta ng NPA

@Balitang Probinsiya | January 16, 2021

NEGROS OCCIDENTAL—Isang sanggol na tinatayang 2-buwang gulang ang natagpuan ng tropa ng pamahalaan kamakalawa sa kuta ng New People’s Army (NPA) sa bulubunduking lugar ng Bgy. San Fernando, Talisay City.

May hinala ang mga awtoridad na ang sanggol ay anak ng isang babaeng miyembro ng NPA.

Ayon sa ulat, may tinanggap na impormasyon ang 3rd Infantry Division ng Philippine Army (PA) na may kuta ng NPA sa nasabing lugar kaya agad itong sinalakay ng mga awtoridad.

Nang makita ng mga NPA ang paparating na mga tropa ng pamahalaan ay mabilis na tumakas ang mga komunista at ang tanging naiwan ay ang sanggol.

Nasa pangangalaga na ngayon ng DSWD ang sanggol, samantalang tinutugis pa ng tropa ng pamahalaan ang mga tumakas na NPA.