Salpukan ng 2 motor, 1 patay

@Balitang Probinsiya | July 18, 2023

ILOILO -- Isang rider ang namatay at isa pa ang sugatan nang magkabanggaan ang dalawang motorsiklo kamakalawa sa Bgy. Sto. Tomas, Passi City sa lalawigang ito.

Ang nasawing biktima ay si Rio Pacino, 39, samantalang ang sugatan ay Eljohn Postremo, 19, kapwa nakatira sa nabanggit na lungsod.

Ayon sa ulat, kapwa umano mabilis ang takbo ng motorsiklong minamaneho nina Pacino at Postremo kaya nagkabanggaan ang dalawang sasakyan sa nasabing barangay.

Napag-alaman na nagtamo ng sugat sa ulo at katawan ang mga biktima at nang dalhin sila ng mga saksi sa ospital ay idineklarang dead-on-arrival si Pacino.

Patuloy ang imbestigasyon ng pulisya para mabatid kung sino ang may pananagutan sa naganap na aksidente.