Rider, utas sa bus

@Balitang Probinsiya | August 5, 2023

QUEZON -- Isang rider ang namatay nang mabangga ng isang pampasaherong bus ang minamaneho nitong motorsiklo kamakalawa sa Bgy. Isabang, Tayabas City sa lalawigang ito.

Ang biktima ay kinilala ng pulisya na si Henry Calabano, nasa hustong gulang at nakatira sa Pasig City.

Ayon sa ulat, nawalan umano ng kontrol si Joel Orteniro, nasa hustong gulang, sa pagmamaneho ng bus kaya nabangga nito ang motorsiklong kinalululanan ni Calabano.

Nabatid na sa lakas ng impact ay nagtamo ng malaking pinsala sa ulo at katawan ang biktima na agad nitong ikinamatay.

Nakapiit na ngayon si Orteniro na nahaharap sa kasong reckless imprudence resulting to homicide and damage to property.