Rider, todas sa rumaragasang jeep

@Balitang Probinsiya | February 2, 2021

QUEZON—Patay ang isang rider nang mabangga ng rumaragasang jeep ang kinalululanan nitong motorsiklo kamakalawa sa Bgy. Bukal Sur, Candelaria.

Ang biktima ay kinilala ng pulisya na si Christian Ayaso, residente ng Bgy. Lagalag, Tiaong sa nasabing lalawigan.

Ayon sa ulat, lulan ng kanyang motorsiklo si Ayaso nang aksidenteng mabangga ito ng jeep na minamaneho ni Edwin Gavino.

Napag-alamang dahil sa lakas ng pagkakabangga ay tumilapon ang biktima at nabagok ang ulo sa kalsada na agad nitong ikinamatay.

Kusa namang sumuko sa pulisya si Gavino na nahaharap sa kasong reckless imprudence resulting to homicide and damage to property.