Rider, sinaksak ng kapwa rider

@Balitang Probinsiya | March 3, 2022

CAMARINES NORTE–Sugatan ang isang hindi kilalang rider nang saksakin ng kapwa niya rider kamakalawa sa Bgy. San Pedro, Sta. Elena.

Sa ngayon ay inaalam pa ng mga awtoridad ang pagkakakilanlan ng biktima, samantalang pinaghahanap na ng pulisya ang suspek na nakilala sa alyas na Kiko, nakatira sa nasabing bayan.

Ayon sa ulat, nagkagitgitan sa kalsada ang minamanehong motorsiklo ng biktima at suspek kaya nagkaroon ng pagtatalo ang dalawa.

Habang nagtatalo ay bigla umanong naglabas ng patalim ang suspek at agad sinaksak ang biktima.

Matapos ang pananaksak ay mabilis na tumakas ang suspek, samantalang dinala ng mga saksi ang biktima sa pagamutan.