Rider patay sa banggaan ng 2 motorsiklo

@Balitang Probinsiya | Pebrero 21, 2023

PALAWAN—Isang rider ang namatay at dalawa katao pa ang sugatan nang aksidenteng magkabanggaan ang dalawang motorsiklo kamakalawa sa Bgy. Napsan, Puerto Princesa City sa lalawigang ito.

Ang nasawi ay si Jomar Dalita, 35, samantalang ang mga sugatan ay ang magkaangkas sa isang motorsiklo na sina Mateo Valdestamon, 29, at Louie Omampas, 18, pawang nakatira sa nabanggit na lungsod.

Ayon sa ulat, kapwa umano mabilis ang takbo ng motorsiklong minamaneho ni Dalita at motorsiklong minamaneho ni Valdestamon, habang kaangkas si Omampas kaya aksidenteng nagkabanggaan ang dalawang sasakyan.

Napag-alaman na nagtamo ng sugat sa ulo at katawan ang mga biktima at nang dalhin sila ng mga saksi sa ospital ay idineklarang dead-on-arrival si Dalita.

Patuloy pa ang imbestigasyon ng pulisya para mabatid kung sino ang may pananagutan sa naganap na aksidente.