Rider dedo, angkas sugatan sa bomba

@Balitang Probinsiya | January 27, 2021

MAGUINDANAO—Isang rider ang namatay at sugatan naman ang angkas nito nang masabugan ng bomba kamakalawa sa Bgy. Romangaob, South Upi.

Kinilala ang nasawi na si Alberto delos Santos, samantalang kinikilala pa ang angkas nito na ginagamot pa sa ospital.

Ayon sa ulat, lulan ng motorsiklo ang dalawang biktima nang sa pagdaan nila sa nasabing lugar ay biglang sumabog ang nakatanim na IED (improvised explosive device).

Dinala ng mga residente ang dalawang biktima sa ospital, pero idineklarang dead-on-arrival si Delos Santos.

Patuloy ang imbestigasyon ng pulisya para makilala ang mga responsable sa pagtatanim ng bomba sa naturang lugar.