Pusher pumalag, tepok sa shootout

@Balitang Probinsiya | May 13, 2023

DAVAO CITY—Isang drug pusher ang napatay nang manlaban at makipagbarilan sa mga tauhan ng pulisya, kamakalawa sa Bgy. Lubogan, Toril District sa lalawigang ito.

Ang suspek na nagtamo ng mga tama ng bala sa katawan ay nakilalang si John Rey Dedoro, nasa hustong gulang at residente ng naturang lungsod.

Nabatid na may nakuhang impormasyon ang pulisya na nagbebenta ng shabu si Dedoro kaya nagsagawa ng buy-bust operation ang mga awtoridad at nang akmang dadakpin ay biglang pinagbabaril ng suspek ang mga operatiba.

Dahil dito, agad gumanti ng putok ang mga operatiba kaya napatay ang suspek.

Nakarekober ang mga awtoridad ng baril, mga bala at mga sachet ng shabu sa pinangyarihan ng insidente.