Parak at 2 pa, timbog sa buy-bust

@Balitang Probinsiya | Pebrero 27, 2023

COTABATO CITY—Tatlong drug pusher na kinabibilangan ng isang pulis ang nadakip sa buy-bust operation ng mga awtoridad kamakalawa sa Bgy. Rosary Heights 10 sa lungsod na ito.

Ang ang mga suspek ay nakilalang sina Pat. Jassim Aking, nakatalaga sa Bangsamoro Autonomous Region in Muslim Mindanao Police Office; Sindatu Macmud at Fatima Usman ng nasabing lungsod.

Napag-alaman na nadakip ang dalawang suspek sa drug-bust operation ng mga awtoridad sa naturang barangay.

Nabatid na nakakumpiska ang mga awtoridad ng ilang gramo ng shabu at markadong pera pag-iingat ng mga suspek.

Hindi naman nanlaban ang mga suspek nang dakpin sila ng mga awtoridad sa naturang lugar at sa ngayon ay sinampahan na sila ng kasong paglabag sa Comprehensive Dangerous Drugs Act of 2002.