Pangako sa health workers, 'wag naman sanang mapako

@Editorial | September 6, 2022

Iniutos na ni Pangulong Ferdinand 'Bongbong' Marcos, Jr. ang agarang pagbibigay ng mga benepisyong naaayon sa batas para sa mga medical workers sa bansa.

Kasunod nito, kinalampag ng isang grupo ng mga healthcare worker ang gobyerno para sa mas magandang benepisyo para sa kanila.

Marami pa rin umano ang hindi pa nakatatanggap ng kanilang One Hospital Command benefit. Sa kanilang ginawang survey noong Agosto, lumalabas na halos nasa kalahati pa ng pangkalahatang bilang ng mga manggagawa sa pangkalusugan ang hindi pa nakatatanggap ng nasabing benepisyo. Kaya hindi natin masisi kung bakit may mga nagpoprotesta pa rin.

Una nang ipinangako po na may pondo mula Enero hanggang Hunyo, pero marami pa rin ang nganga sa One COVID-19 Allowance (OCA).

Nasaan ang problema? Nasa Department of Health (DOH)? Sino ang naghahawak ng mga benepisyo at nagre-release?

Nangako na rin ang mga mambabatas na tutulong sa pamahalaan na matugunan ang mga suliraning ito at gayundin ang matagal nang inaasam ng mga nurse na mapabuti ang kalagayan nila, pangunahin na ang pagpapataas pa ng kanilang sahod. Ang tanong, kailan matutupad ang pangako? Huwag naman sanang mapako.

Nasaksihan naman natin kung paano sila araw-araw na nagbubuwis-buhay para sa kalusugan ng mamamayan, ano pa ba ang kulang?

Huwag nating hintayin na mapilitan silang umalis ng bansa dahil din sa ating kapabayaan.

Walang ibang panahon para ibigay ang mga benepisyo at makatarungang suweldo para sa mga health workers, kundi ngayon.