Pagugulungin na sana ni Casimero si Inoue

ni ATD - @Sports | July 8, 2020

Kapag maayos ang ensayo kahit sino ang makalaban ni World Boxing Organization (WBO) bantamweight champion John Riel Casimero ay pagugulungin niya.

Pero posibleng maudlot ulit ang unification bout nina Casimero at World Boxing Association (WBA) at International Boxing Federation (IBF) titlist Naoya Inoue.

Problema ni Inoue na makakuha ng visa para makarating ito sa Amerika ayon sa Top Rank Promotions, kaya hindi masabi ang petsa kung kelan ang laban nila ni Casimero.

Upang hindi mabitin ang laban ni Casimero ay humahanap ang Top Rank ng mga posibleng makaharap ng Pinoy boxer. “Ako naman kaya ko kahit sino kalaban basta tama ang ensayo ko, walang tatalo basta nasa kundisyon ako,” saad ni Casimero.

Sakaling hindi dumating si Inoue sa Amerika hanggang sa katapusan ng Hulyo, nakapila kay Casimero sina dating world title challenger Rasheen Warren ng Amerika, Jason Moloney ng Australia at Pedro Guevara ng Mexico.

Mamimili na lamang si Casimero sa tatlong boksingerong nag-aabang.