Pagkalat ng deepfake videos, palala nang palala

by Info @Editorial | July 15, 2025

Sa panahon ng mabilis na pag-usbong ng teknolohiya, kasabay din nito ang paglawak ng mga paraan upang makapanloko. 

Isa na rito ang paggamit ng deepfake videos — mga pekeng video na ginagamitan ng artificial intelligence (AI) upang gayahin ang mukha, boses, at kilos ng isang tao. 

Kaugnay nito, muling nagbabala ang Securities and Exchange Commission (SEC) sa publiko tungkol sa patuloy na paglaganap ng mga deepfake video.Hindi na bago ang ganitong modus, ngunit ang antas ng realismong naipapakita ng mga deepfake video ngayon ay tunay na nakababahala. 

Ginagamit ang imahe ng mga kilalang personalidad, kabilang ang mga opisyal ng gobyerno o mga respetadong negosyante, upang magmukhang lehitimo ang mga investment schemes na sa huli ay isa lamang trap para sa mga walang kamalay-malay.

May mahalagang papel na dapat gampanan ang bawat sektor ng lipunan. 

Ang gobyerno ay kailangang palakasin ang mga batas laban sa cybercrime, lalo na sa paggamit ng deepfake. 

Ang media at social media platforms naman ay may responsibilidad sa fact-checking at mabilis na pagtugon sa maling impormasyon. 

Higit sa lahat, ang mamamayan ay dapat maging mapanuri, mapagbantay, at huwag basta-bastang magtiwala sa mga nakikita online.