NPA, patay sa engkuwentro

@Balitang Probinsiya | June 12, 2023

CAMARINES SUR -- Isang miyembro ng New People’s Army (NPA) ang napatay sa naganap na engkuwentro sa pagitan ng tropa ng pamahalaan at mga komunista kamakalawa sa Bgy. Antipolo, Iriga City sa lalawigang ito.

Sa ngayon ay inaalam pa ng mga awtoridad ang pagkakakilanlan ng napatay na miyembro ng NPA na nag-o-operate sa lalawigan.

Nabatid na nakatanggap ng impormasyon ang mga awtoridad na may mga armadong lalaki na gumagala sa nasabing barangay kaya agad rumesponde ang mga sundalo ng Philippine Army (PA) at pulisya. Dadakpin na sana ang mga komunista pero pinagbabaril ng mga suspek ang mga operatiba ng pamahalaan.

Ayon sa ulat, nakaganti agad ng putok ang mga awtoridad na naging dahilan kaya napatay ang isang NPA, subalit nakatakas ang iba pang komunista.

Patuloy pang tinutugis ng tropa ng pamahalaan ang mga tumakas na miyembro ng NPA.