Notoryus na pusher, todas sa shootout

@Balitang Probinsiya | February 1, 2021

TAWI-TAWI—Isang notoryus na drug pusher ang napatay nang pumalag at makipagbarilan sa pulisya kamakalawa sa Bgy. Bintawlan, South Ubian.

Kinilala ng pulisya ang suspek na nagtamo ng mga tama ng bala sa katawan na si Winnie Basanon, nakatira sa naturang barangay.

Nabatid na darakpin sana ng pulisya si Basanon sa drug-bust operation, pero biglang bumunot ng baril at pinagbabaril ng suspek ang mga awtoridad.

Napag-alamang mabilis na nakaganti ng putok ang mga operatiba kaya napatay ang suspek.

Nakarekober ang pulisya ng baril, mga bala at ilang sachets ng shabu sa pinangyarihan ng insidente.