Negosyante, todas sa mga armado

@Balitang Probinsiya | January 11, 2021

BATANGAS—Isang negosyante ang namatay nang barilin ng mga armadong lalaki sa labas ng kanilang bahay kamakalawa sa Bgy. San Vicente, Sto. Tomas.

Kinilala ng pulisya ang biktimang nagtamo ng mga tama ng bala sa katawan na si David Garcia, nakatira sa nabanggit na barangay.

Ayon sa ulat, nakatayo umano si Garcia sa harap ng kanilang bahay nang biglang dumating ang mga suspek at agad pinagbabaril ang biktima.

Mabilis na tumakas ang mga salarin lulan ng SUV (Sports Utility Van) matapos ang pamamaril.

Dinala pa ng kanyang mga kamag-anak si Garcia sa pagamutan, pero idineklara itong dead-on-arrival.