Mga armas at pampasabog ng NPA, narekober

@Balitang Probinsiya | August 15, 2023

ILOILO -- Narekober ng mga awtoridad ang iba’t ibang uri ng baril, mga bala at mga pampasabog sa kuta ng mga komunistang New People’s Army (NPA) kamakalawa sa bulubunduking lugar ng Bgy. Barasalon, Janiuay sa lalawigang ito.

Ang mga narekober ay dalawang armalite rifles, isang kalibre .45 pistola, walong IED o improvised explosives device at iba't ibang uri ng bala.

Ayon sa ulat, may nagbigay impormasyon sa mga awtoridad patungkol sa kuta ng mga NPA sa nasabing lugar.

Dahil dito, agad sinalakay ng tropa ng pamahalaan ang nabanggit na lugar, pero nakatakas ang mga NPA at dito natagpuan ang mga nakatagong armas ng mga komunista.

Patuloy pang tinutugis ng tropa ng gobyerno ang mga tumakas na NPA.