May kasong child trafficking nasakote

@Balitang Probinsiya | December 17, 2022

CAMARINES NORTE—Isang lalaki na may kasong child trafficking ang inaresto ng pulisya kamakalawa sa bayan ng Capalonga.

Hindi muna pinangalanan ang suspek habang iniimbestigahan ito ng mga awtoridad.

Ayon sa ulat, inaresto ang suspek sa bisa ng warrant of arrest na inisyu ng korte kaugnay sa kinasasangkutan nitong kasong paglabag sa Republic Act 7610 na mas kilala sa tawag na child trafficking.

Nabatid na matagal nang pinaghananap ng pulisya ang suspek at kamakalawa lang itong natiyempuhang madakip.

Hindi naman nanlaban ang suspek sa mga awtoridad at sa ngayon ay nakapiit na siya sa detention cell ng himpilan ng pulisya.