Magsasaka, tiklo sa tanim na marijuana

@Balitang Probinsiya | May 24, 2023

CAGAYAN—Isang magsasaka na nagtanim ng marijuana ang dinakip ng mga awtoridad kamakalawa sa bayan ng Lal-lo sa lalawigang ito.

Hindi na muna pinangalanan ng pulisya ang suspek habang iniimbestigahan pa ito ng mga awtoridad.

Ayon sa ulat, ilang residente ang nagbigay impormasyon sa pulisya na may pananim na marijuana ang suspek sa nasabing barangay kaya agad rumesponde ang mga awtoridad at inaresto ang magsasaka.

Nabatid na nakakumpiska ang mga awtoridad ng limang piraso ng tanim na marijuana sa bakuran ng bahay ng suspek.

Nakapiit na ang suspek na nahaharap sa kasong paglabag sa Comprehensive Dangerous Drug Act of 2002.