Magsasaka, sinaksak ng kaibigan

@Balitang Probinsiya | May 9, 2023

PALAWAN—Isang magsasaka ang sugatan nang saksakin ng kanyang kaibigan, kamakalawa sa Bgy. Burirao, Narra sa lalawigang ito.

Ang biktimang nagtamo ng isang tama ng saksak sa katawan ay nakilalang si Jessie Camelo, samantalang ang suspek ay si Ryan Dalmacio, kapwa nakatira sa nasabing bayan.

Ayon sa ulat, nagtungo sina Camelo at Dalmacio sa isang okasyon sa naturang barangay at pauwi na sila ngunit sa hindi malamang dahilan ay biglang sinaksak ng suspek ang biktima.

Agad dinala ng mga saksi si Camelo sa ospital, at sa kasalukuyan ay inoobserbahan pa siya sa pagamutan.

Nadakip naman ng mga nagrespondeng awtoridad ang suspek at sa ngayon ay nakapiit na ito sa detention cell ng himpilan ng pulisya.