Magsasaka, sapol ng ligaw na bala

@Balitang Probinsiya | December 31, 2020

NUEVA ECIJA—Isang magsasaka ang sugatan nang tamaan ng ligaw na bala kamakalawa sa Bgy. Sabit, Guimba.

Ang biktima ay kinilala ng pulisya na si Roger Morales, nakatira sa naturang barangay.

Ayon sa ulat, nagpapahinga umano si Morales sa loob ng kanyang bahay-kubo nang tamaan ito ng ligaw na bala sa kanang hita.

Kaagad dinala ng kanyang mga kamag-anak si Morales sa ospital at kasalukuyan na itong ginagamot.

Nagpalabas na ng manhunt operation ang pulisya para madakip ang nagpaputok ng baril sa nasabing lugar.