Magsasaka patay sa tuklaw ng ahas

@Balitang Probinsiya | Pebrero 7, 2023

CATANDUANES — Isang magsasaka ang namatay matapos matuklaw ng ahas kamakalawa sa bulubunduking lugar ng Bgy. Mabini, Panganiban sa lalawigang ito.

Kinilala ang biktima na si Jesse Olegasco, 26-anyos, nakatira sa nabanggit na barangay.

Ayon sa mga kapwa magsasaka ni Olegasco, narinig nilang sumigaw ang biktima na natuklaw siya ng ahas.

Agad tinungo ng mga kapwa niya magsasaka ang kinaroroonan ni Olegasco at natagpuan nila itong walang malay.

Dinala pa ng mga kapwa niya magsasaka si Olegasco sa ospital, pero idineklara itong dead-on-arrival.