Magsasaka, patay sa kuryente

@Balitang Probinsiya | August 5, 2023

ILOILO -- Isang magsasaka ang namatay nang makuryente kamakalawa sa Bgy. Miraga Guibuangan, Sta. Barbara sa lalawigang ito.

Hindi muna pinangalanan ng pulisya ang biktima hangga’t hindi pa naipapaalam sa pamilya nito ang pagkamatay ng nasabing magsasaka.

Ayon sa ulat, napahawak ang magsasaka sa isang live wire na nakalaylay mula sa isang piggery farm kaya nakuryente ang biktima.

Agad dinala ng mga residente ang biktima sa ospital, pero idineklara itong dead-on-arrival.

Sa ngayon, inaalam pa ng pulisya ang kasong isasampa sa may-ari ng piggery farm para papanagutin sa pagkamatay ng biktima.