Magkaangkas sa motor nahulog sa bangin

@Balitang Probinsiya | March 6, 2023

BATANGAS—Dalawang babaeng magkaangkas sa motorsiklo ang sugatan nang mahulog kamakalawa sa bangin na sakop ng Bgy. Malabrigo, Lobo sa lalawigang ito.

Isa lang sa dalawang babae ang nakilala ng pulisya, at siya ay si Lorena Gonzaga, 53-anyos, samantalang inaalam pa ang pagkakakilanlan ng isa pang biktima.

Ayon sa ulat, nawalan umano ng kontrol si Gonzaga sa pagmamaneho ng motorsiklo habang kaangkas ang kasama niyang babae kaya nahulog sila sa bangin.

Nabatid na kaagad sumaklolo ang mga residente at dinala sa pagamutan ang dalawang biktima.

Nabatid na patuloy pa rin ang imbestigasyon ng mga awtoridad sa naganap na aksidente.