Mag-utol na pusher, tiklo sa buy-bust

@Balitang Probinsiya | October 26, 2020

ILIGAN CITY—Naaresto ng mga awtoridad sa isinagawa nilang buy-bust operation ang magkapatid na drug pusher kamakalawa sa Bgy. Santiago.

Kinilala ang magkapatid na suspek na sina Robinson at Angelo Lambequit, kapwa nakatira sa nasabing lungsod.

Ayon sa ulat, nagsagawa ng buy-bust operation ang mga operatiba sa nasabing lugar at nang pagbentahan sila ng shabu ng magkapatid na pusher ay agad dinakip ang mga suspek.

Nabatid na nakakumpiska ang mga awtoridad ng limang sachets ng shabu at markadong pera sa pag-iingat ng mga suspek.

Nakapiit na ang magkapatid na suspek na kapwa nahaharap sa kasong paglabag sa Comprehensive Dangerous Drugs Act of 2002.