Mag-asawa, dedbol sa pick-up

@Balitang Probinsiya | October 08, 2023

NEGROS OCCIDENTAL -- Namatay ang mag-asawang lulan ng isang motorsiklo nang mabangga ng isang pick-up kamakalawa sa Bgy. Lag-asan, Bago City sa lalawigang ito.

Kinilala ng pulisya ang mag-asawang biktima na sina Benjie at Mary Joy Siasico, kapwa nasa hustong gulang at parehong residente sa nasabing lungsod.

Ayon sa ulat, mabilis ang takbo ng pick-up na minamaneho ng isang hindi pinangalanang 22-anyos na estudyante kaya aksidenteng nabangga nito ang motorsiklong kinalululanan ng mag-asawang Siasico.

Nabatid na nagkaroon ng malaking pinsala sa ulo at iba’t ibang parte ng katawan ang mga biktima.

Dinala ng mga saksi ang mag-asawang biktima sa ospital, pero kapwa sila idineklarang dead-on-arrival sa pagamutan, samantalang kusa namang sumuko sa pulisya ang estudyanteng driver ng pick-up.