Lolo, dedbol sa motorsiklo

@Balitang Probinsiya | December 23, 2021

PANGASINAN—Isang 72-anyos na lolo ang namatay nang aksidenteng mabangga ng motorsiklo ang kinalululanan nitong bisikleta kamakalawa sa Bgy. Caranglaan, Dagupan City.

Ang biktima ay kinilala ng pulisya na si Benito Pastoral, nakatira sa nasabing bayan, samantalang kusa namang sumuko sa mga awtoridad ang hindi pinangalang driver ng motorsiklo.

Ayon sa ulat, mabilis umano ang takbo ng motorsiklo kaya aksidenteng nabangga ang kinalululanang bisikleta ng biktima.

Dahil sa tinamong mga sugat sa ulo at katawan ay agad namatay sa pinangyarihan ng aksidente ang biktima.

Nangako naman ang driver ng motorsiklo na sasagutin niya ang lahat ng gastusin sa pagkamatay ng biktima.