Lasing nanuntok ng pulis arestado

@Balitang Probinsiya | December 22, 2022

SORSOGON—Isang lasing na tricycle driver na nanuntok ng pulis ang dinakip ng mga awtoridad kamakalawa sa Bgy. Pangpang, Sorsogon City.

Kinilala ng pulisya ang suspek na si Junnel Haviera, residente ng nabanggit na barangay, samantalang hindi na pinangalanan ang biktimang pulis.

Ayon sa ulat, dala ng labis na kalasingan ay mabilis na pinatatakbo ni Haviera ang kanyang tricycle, kaya hinabol ito ng pulis at nang maabutan ay sinita sa pagmamaneho nito ng lango sa alak.

Nabatid na imbes magpaliwanag ay biglang sinuntok ni Haviera ang pulis.

Dahil dito, dinakip ng pulisya ang suspek at sinampahan ng kasong physical injury, direct assault against person in authority at driving under the influence of liquor.