Lasing na holdaper, tumalon sa tulay

@Balitang Probinsiya | May 18, 2023

NEGROS OCCIDENTAL—Isang lasing na holdaper ang sugatan nang tumalon sa tulay, kamakalawa sa Bgy. Caliban, Murcia sa lalawigang ito.

Kinilala ang suspek na si Fernando Camporaso, Jr., nasa hustong gulang at residente ng nasabing bayan.

Ayon sa ulat, lasing si Camporaso nang maglabas ng patalim, harangin at holdapin ang dalawang lending collector na nakasakay sa isang motorsiklo.

Matapos kunin ang bag na may lamang cash ng isa sa lending collector, mabilis na tumakbo si Camporaso, pero nakita siya ng mga nagpapatrolyang tauhan ng pulisya kaya hinabol ang suspek, at sa takot ng lasing na holdaper ay bigla itong tumalon sa tulay.

Dinala ng mga awtoridad ang suspek sa ospital at habang ginagamot ito sa pagamutan, inihahanda na rin ng pulisya ang kasong robbery laban kay Camporaso.