Laborer todas sa gumuhong lupa

@Balitang Probinsiya | March 3, 2023

MOUNTAIN PROVINCE — Isang laborer ang namatay nang gumuho ang lupa at matabunan ito kamakalawa sa construction site sa Brgy. Abatan, Abuko sa lalawigang ito.

Ang biktima ay kinilala ng pulisya na si Rodante Laluan, nasa hustong gulang at residente ng Pozorrubio, Pangasinan.

Ayon sa ulat, habang nagtatrabaho si Laluan sa construction site ay gumuho ang lupang kinatatayuan nito kaya natabunan ang biktima.

Nabatid na inabot ng halos kalahating oras bago nahukay at nailabas ng ibang construction worker ang biktima sa gumuhong lupa.

Agad dinala ng mga katrabaho ni Laluan ang biktima sa ospital, pero idineklara itong dead-on-arrival.