Laborer, kinatay ng katoma

@Balitang Probinsiya | May 11, 2023

NEGROS OCCIDENTAL—Isang laborer ang pinagtataga at napatay ng kanyang nakaalitang kainuman, kamakalawa sa Bgy. San Isidro, Taboso sa lalawigang ito.

Ang biktimang nagtamo ng mga tama ng taga sa katawan ay nakilalang si Marvin Encarquez, nasa hustong gulang at residente sa nabanggit na barangay.

Samantala, hindi muna pinangalanan ang suspek hangga't hindi ito nadadakip ng mga awtoridad.

Ayon sa pulisya, habang nag-iinuman ay nagkaroon ng pagtatalo ang dalawa na humantong para pagtatagain ng salarin ang biktima.

Agad dinala ng mga saksi ang biktima sa pagamutan, pero idineklara itong dead-on-arrival.

Nagpalabas na ng manhunt operation ang pulisya para madakip ang suspek na nahaharap sa kasong murder.