Laborer dedo, kaibigan sugatan sa pananaga

@Balitang Probinsiya | March 7, 2021

CAPIZ—Isang laborer ang namatay at sugatan naman ang kaibigan nito nang tagain sila ng kanilang kaalitan kamakalawa sa Bgy. San Rafael, Dumalag.

Kinilala ang nasawi na si Niño Facularin, 30-anyos, samantalang ang sugatan ay si Rommel Biaco, 42-anyos, kapwa nakatira sa nasabing barangay.

Ayon sa ulat, kumakain ang dalawang biktima nang sumulpot ang suspek na si Ernan Fantinalgo at agad pinagtataga ang dalawang biktima.

Matapos ang pananaga ay mabilis na tumakas ang suspek, samantalang dinala naman ng mga saksi sa ospital ang dalawang biktima, pero idineklarang dead-on-arrival si Facularin dahil sa dami ng tinamong tama ng taga sa iba’t ibang bahagi ng katawan.

Napag-alamang may dati nang alitan ang mga biktima at ang suspek.